Tunaweza kuendelea na somo hili sehemu ya pili kuhusu kuwalea watoto. Ni muhimu kwanza kufahamu mtoto anayo hisia.Ndio maana mtoto anapozaliwa anahisi mazingira tofauti ya hapa duniani.
Mojawapo ya mambo ambayo yanadhihirisha wazi ya kwamba anayo hisia au kuhisi ni haya yafuatayo:
1. Mama yake anapomwekea ziwa mdomoni kwa mara ya kwanza azaliwapo huanza kunyonya.
2. Wakati akiwa ni mwenye njaa hulia kwa sababu anahisi njaa.
3. Wakati anapoumwa au kuumia hulia kwa sababu anahisi maumivu.
4. Wakati wa baridi au joto kali anakuwa anahisi. Ndio maana mtoto akiwa analia sana ujue kuna sababu. Chunguza ni kwa nini analia ili upate ufumbuzi na kumsaidia. Wakati mwingine inawezekana hakupata usingizi wa kutosha anao uchovu. Pia kutokana na mazingira mnayoishi kuna usumbufu wa kelele za mara kwa mara. Kwa sababu hiyo hawezi kupata usingizi.
5. Mama anapomlaza mtoto na kumwacha anahisi yuko pekee yake na hatimaye kulia.
Baada ya mtoto kuzaliwa hujifunza mambo mbalimbali.Jambo mojawapo mtoto hujifunza ni kuongea. Ni pale anapowasikia wazazi au walezi maneno wanayosema ndipo na yeye anaanza kusema neno mojawapo ambalo amewahi kulisikia.
Kwa hiyo kwa kadri anavyoendelea kukua unafika wakati ambao anaanza kuunganisha maneno na kuyasema kwa usahihi.
Pia hujifunza na kuiga kila kitu anachosikia na anachokiona kwa mtu yeyote kama katika familia, watoto wenzake na watu wengine.
Kwa sababu hiyo ni muhimu kumlinda na kuhakikisha watu anaokaa nao katika familia ni salama. Na pia wawe ni watu wanaomjenga katika misingi ya maadili mema.
Ili kumjenga katika maadili mema. Mfundishe mtoto katika maadili haya yafuatayo;
> Kumshukuru Mungu kwa ajili ya chakula kabla ya kula.
> Kufanya ibada mbele za Mungu kwa kuomba, kusifu na kuabudu.
> Kuwaheshimu watu ambao wamemzidi umri na kuwaamkia. Pia kuwaheshimu watoto wenzake ambao wanalingana umri.
Katazo au onyo kwa mtoto.Kumkataza mtoto kwa yale mambo ambayo hayafai na kumwambia acha hiyo siyo njia pekee ya kumjenga.
Ikiwa mtoto anazungumza maneno mabaya ambayo alisikia ni muhimu kwa mzazi au mlezi kumrekebisha na kumwambia maneno hayo ni mabaya usiyaseme tena, hayafai, na wala hayampendezi Mungu. Na hatimaye huacha kuyasema na kuweka kumbukumbu moyoni mwake ya kwamba hayo ni maneno mabaya hayafai kusemwa.
Mtoto akishafikisha umri wa miaka mitatu ni mwepesi kutaka kujua kila kitu anchokiona ni nini? Au kinaitwaje? Kwa hiyo anapokuwa amefikia umri huo wakati unaendelea kumlea katika neno la Mungu na kushiriki naye katika ibada atakuwa mcha Mungu na mnyenyekevu. Na baadhi yao walio na umri huo wamejaliwa na Mungu kujazwa Roho Mtakatifu na kunene kwa lugha mpya.
Kumchapa mtoto siyo njia pekee ya kumrekebisha kwa sababu yamkini hajui kosa alilofanya. Kwa sababu hiyo kabla ya kumchapa mtoto ni muhimu kumfahamisha kosa lake ili aweze kulifahamu. Kwa kufanya hivyo anakuwa amelifahamu kosa lake na kujirekebisha. Kumchapa mtoto ni hatua inayofuata baada ya kumwambia kosa lake. Kuwa makini usimchape mtoto wako wakati unayo hasira kwa sababu hutakiwa na busara na hatimaye utamuumiza.
Angalizo au tahadhari. Kuwa makini sana wewe mzazi na mlezi. Kwa sababu watoto hujifunnza kile wanachokiona au kusikia. Kwa ajili ya malezi mema ni muhimu kuvaa mavazi ya staha ambayo yanasitiri mwili. Jambo lingine la muhimu epuka ugomvi na mabishano mbele ya watoto.
Malezi ya mtoto huanzia nyumbani. Shule ya kwanza ya mtoto inaanza nyumbani kwa wazazi wake. Kwa hiyo wazazi wanapaswa kuwalea watoto wao katika maadili mema na kuwalinda au kuwaepusha na mabaya. Wewe mzazi au mlezi ndiwe mlinzi wa mtoto. Hakikisha mtoto wako yuko salama wakati wote. Soma sehemu ya kwanza
Maoni
Chapisha Maoni